कालीकोट ११ भाद्र । रसुवा जिल्लामा हालै आएको विनाशकारी बाढीका कारण कर्णाली प्रदेशका १३४ जना नागरिक सम्पर्कविहीन भएका छन्। कर्णाली प्रदेश सरकारद्वारा जारी २०८३ भाद्र ११ गते राति १०:५० बजेसम्मको अद्यावधिक तथ्याङ्क अनुसार, सम्पर्कविहीन हुनेहरूमा १०८ पुरुष, १७ महिला, ६ बालक र ३ बालिका रहेका छन्।
तथ्याङ्क अनुसार सबैभन्दा धेरै सल्यानका ४९ जना सम्पर्कविहीन छन्, जुन कुल संख्याको ३६.६% हो। यसैगरी, जुम्लाका ३१ (२३.१%), हुम्लाका १२ (९.०%), मुगुका १२ (९.०%), सुर्खेतका ११ (८.२%), दैलेखका ५ (३.७%), जाजरकोटका ३ (२.२%), कालिकोटका ५ (३.७%), रुकुम पश्चिमका ४ (३.०%) र डोल्पाका २ (१.५%) जना अझै सम्पर्कमा आएका छैनन्।
सम्पर्कविहीन नागरिकहरूको खोज तथा उद्धारका लागि स्थानीय प्रशासन र प्रहरीको टोली खटाइएको छ। यद्यपि, बाढी प्रभावित क्षेत्रमा निरन्तर वर्षा भइरहेकाले उद्धार कार्यमा केही कठिनाइ भइरहेको प्रशासनले जनाएको छ। पीडित परिवारहरूले आफ्ना सदस्यहरूको शीघ्र खोजी र उद्धारका लागि सरकारसँग अपिल गरेका छन्।
कालिकोटका प्रमुख जिल्ला अधिकारी छविलाल भट्टराईले रसुवाको स्थानीय प्रशासन र सम्बन्धित कम्पनीहरूसँग समन्वय गरी खोज तथा उद्धार कार्यलाई तीव्र बनाउन पहल भइरहेको जानकारी दिएका छन्। उनले थप विवरणहरू संकलन भइरहेको र प्रशासनले अद्यावधिक जानकारी निरन्तर उपलब्ध गराउने प्रतिबद्धता व्यक्त गरेका छन्।
