कालीकोट भाद्र २७ गते । नेपाल तरुण दल कालीकोटको आयोजनामा सदरमुकाम मान्मस्थित खुलामञ्चमा सञ्चालित ‘प्रथम तरुण एकता कप’ प्रतियोगिताको भलिबलतर्फ नरहरिनाथ गाउँपालिका र फुटबलतर्फ पञ्चदेव फुटबल क्लबले उपाधि चुमेका छन्।
शनिबार सम्पन्न घमासान फाइनल खेलमा नरहरिनाथ गाउँपालिका–४ ले खाँडाचक्र नगरपालिका–६ को टोलीलाई पराजित गर्दै भलिबलतर्फको प्रथम ऐतिहासिक उपाधि आफ्नो नाममा लेखाएको हो। प्रतिस्पर्धात्मक खेलमा पराजित खाँडाचक्र–६ उपविजेतामा सीमित बनेको छ।
उपाधिसँगै विजेता नरहरिनाथले नगद ७० हजार रुपैयाँसहित आकर्षक कप, मेडल र प्रमाणपत्र प्राप्त गरेको छ भने उपविजेता बनेको खाँडाचक्र–६ ले नगद ४० हजार रुपैयाँ, कप र मेडलमा चित्त बुझाएको छ।
यसैगरी प्रतियोगिताअन्तर्गत फुटबलतर्फ पञ्चदेव फुटबल क्लबले सर्वोत्कृष्ट प्रदर्शन गर्दै प्रथम स्थान हासिल गरेको छ। फाइनलमा पञ्चदेवसँग पराजित बनेको भेट्रान्स राइड्स दोस्रो स्थानमा समेटियो। फुटबलतर्फको विजेता पञ्चदेव क्लबले नगद २५ हजार रुपैयाँ, मेडल र प्रमाणपत्र हात पार्यो भने उपविजेता भेट्रान्स राइड्सले नगद १५ हजार रुपैयाँ, मेडल र प्रमाणपत्र प्राप्त गर्यो।
समापन कार्यक्रमलाई सम्बोधन गर्दै नेपाल तरुण दल कालीकोटका अध्यक्ष दमनराज शाहीले जिल्लामा पहिलोपटक यति ठूलो स्तरमा तरुण एकता कप आयोजना गरिएको जानकारी दिए। युवाहरूलाई खेलकुदको माध्यमबाट जोड्दै उनीहरूमा आपसी एकता, सहकार्य, अनुशासन र भाइचाराको भावना अभिवृद्धि गर्ने मूल उद्देश्यका साथ प्रतियोगिता सञ्चालन गरिएको उनले बताए। उनका अनुसार आयोजना गरिएको यस प्रतियोगितामा भलिबलतर्फ १६ र फुटबलतर्फ १२ गरी कुल २८ टोलीको उत्साहजनक सहभागिता रहेको थियो।
कार्यक्रममा बोल्दै नेपाली काङ्ग्रेस कालीकोटका सभापति अम्मलराज शाहीले पार्टीभित्र आन्तरिक मतभेद र विवाद चलिरहेका बेला यस तरुण कपले सिङ्गो पार्टी पङ्क्तिलाई एकताबद्ध बनाउन र उत्साह भर्न अतुलनीय योगदान पुर्याएको उल्लेख गरे। युवा वर्गलाई सिर्जनात्मक कार्यमा परिचालन गर्दै सांगठनिक एकता कायम गर्न सहयोग पुर्याएको भन्दै उनले आयोजक तरुण दललाई धन्यवाद ज्ञापन गरे। साथै विजेता तथा उपविजेता सम्पूर्ण खेलाडीहरूलाई बधाई दिँदै उहाँहरूका आगामी खेल जीवनको सफलताको शुभकामना व्यक्त गरे।
