मान्म ६ भाद्र। आन्तरिक राजस्व कार्यालय जुम्लाको समन्वय, उद्योग वाणिज्य सङ्घ कालीकोटको आयोजना र हिमचुली कृषि सहकारी संस्थाको सहकार्यमा सदरमुकाम मान्ममा करदाता शिक्षा कार्यक्रम सम्पन्न भएको छ। हिमचुलीको सभाहलमा उद्योग वाणिज्य सङ्घका अध्यक्ष रतनबहादुर शाहीको अध्यक्षता तथा संस्थाका मुख्य व्यवस्थापक जगेन्द्र आचार्यको आतिथ्यतामा कार्यक्रम भएको हो।
कार्यक्रममा आन्तरिक राजस्व कार्यालय जुम्लाका कर अधिकृत भूपि पौड्याल र सन्देश घिमिरेले करका दर, दाखिला गर्ने समयसीमा, छुट तथा जरिवानाका कानुनी प्रावधानबारे सहजीकरण गर्नुभएको थियो।
तर, वर्षेनि सदरमुकामका निश्चित व्यापारीहरूलाई मात्रै हलमा राखेर गरिने यस्ता औपचारिक कार्यक्रमले दूरदराजका करदातालाई छुन नसकेको भन्दै स्थानीयले तीव्र असन्तोष व्यक्त गरेका छन्। करसम्बन्धी अलमल र झन्झट स्थानीय तहका व्यापारीहरूले व्यहोर्नुपर्ने तर करदाता शिक्षा भने मान्मका सभाहलमा सीमित गरेर बजेट पचाउने मेसो मात्र बनाइएको नागरिकको आरोप छ।
करको दायरमा सबैलाई ल्याउने हो भने यस्ता कर्मकाण्डी कार्यक्रम छाडेर पालिका स्तरमै पुगी प्रभावकारी सेवा र शिक्षा दिनुपर्नेमा व्यवसायीहरूले जोड दिएका छन्। प्रक्रियागत झन्झट हटाएर कर तिर्ने वातावरण सहज नबनाएसम्म यस्ता देखावटी अभिमुखीकरणको कुनै औचित्य नरहने सहभागीहरूको भनाइ थियो।
