नयाँ कार्यविधिअनुसार सार्वजनिक खरिदसँग जोडिएका उद्योग, कलकारखाना तथा मालसामान आपूर्तिकर्ता फर्ममा कार्यरत सबैभन्दा आधारभूत तहका श्रमिकको न्यूनतम मासिक पारिश्रमिक सामाजिक सुरक्षा कोषको योगदानसहित अब ३२ हजार ६०७ रुपैयाँ पुगेको छ। यसैगरी सरकारी ठेक्कापट्टामा खटिने दैनिक ज्यालादारी निर्माण श्रमिकले सरकार र रोजगारदाताको १०–१० प्रतिशत सामाजिक सुरक्षा साझेदारीसहित कम्तीमा दैनिक १ हजार ७४० रुपैयाँ अनिवार्य रूपमा पाउने व्यवस्था गरिएको छ। यसबाहेक श्रमिकहरूलाई सरकारी सेवासरह चाडपर्व खर्च, बिदा तथा अन्य भत्ताहरू उपलब्ध गराउनुपर्ने र सम्पूर्ण रकम बिचौलियाबिना सीधै श्रमिकको व्यक्तिगत बैंक खातामै जम्मा गर्नुपर्ने बाध्यात्मक नियम बनाइएको छ।