सुर्खेत, २० कार्तिक । कर्णाली प्रदेशको राजधानी सुर्खेतमा आयोजना हुन गइरहेको बहुप्रतीक्षित ‘दशौँ राष्ट्रिय खेलकुद प्रतियोगिता’ अन्तर्गत विभिन्न ४२ खेल विधाहरूको प्रस्तावित खेलस्थल तथा खेलतालिका औपचारिक रूपमा सार्वजनिक गरिएको छ। मंसिर १६ गतेदेखि सुरु हुने राष्ट्रिय खेल महोत्सवलाई लक्षित गर्दै आयोजकले कर्णाली प्रदेशका विभिन्न जिल्लासहित छिमेकी जिल्लाहरूमा समेत खेलहरू विभाजन गरी विस्तृत कार्यतालिका बाहिर ल्याएको हो।
सार्वजनिक प्रस्तावित तालिकाअनुसार प्रतियोगिताको अधिकांश खेलहरू राजधानी सुर्खेतस्थित मुख्य रंगशाला, क्रिकेट ग्राउन्ड, कभर्ड हल तथा सेनाको खेल मैदानमा केन्द्रित रहनेछन्। पुरुष तथा महिला फुटबल, क्रिकेट, बास्केटबल, भलिबल, एथलेटिक्स, बक्सिङ र कराँते लगायतका मुख्य आकर्षणका खेलहरू सुर्खेतमै सञ्चालन हुनेछन्। त्यसैगरी अन्य जिल्लाहरूलाई खेलकुदमार्फत जोड्ने उद्देश्यले शारीरिक सुगठन पश्चिम रुकुमको चौरजहारीमा, आईटीएफ तेक्वान्दो दैलेखमा, जुडो तथा कुस्ती सल्यानको श्रीनगरमा र बुद्धिचाल (चेस) कालीकोट कभर्ड हलमा आयोजना गर्ने प्रस्ताव गरिएको छ। पौडी, सुटिङ तथा टेनिस र खो–खोका खेलहरू भने पूर्वाधारको उपलब्धताका आधारमा बाँकेको नेपालगन्ज र बर्दियाको भुरीगाउँमा खेलाइने कार्यतालिकामा उल्लेख छ।
प्रतियोगितामा समावेश ४२ खेल विधाको समयसीमा मंसिर ०८ गतेदेखि मंसिर २६ गतेसम्मको अवधिभित्र रहने गरी तय गरिएको छ। आयोजकका अनुसार यो तालिका प्रस्तावित भएकाले प्राविधिक कारणवश आवश्यक परेको खण्डमा केही खेलस्थल तथा मितिमा सामान्य हेरफेर हुन सक्ने व्यवस्था राखिएको छ। तालिका सार्वजनिक भएसँगै सहभागी टोली र खेलाडीहरूलाई आफ्नो तयारी तथा प्रशिक्षण तीव्र बनाउन स्पष्ट मार्गचित्र मिलेको छ।
