काम र सन्दर्भ खुलाइसकेपछि उत्तरको बाह्य ढाँचा र स्वरूप (Format & Structure) निर्धारण गरिदिनुपर्छ। सामग्री समाचारको ढाँचामा आउने हो वा अनुच्छेद, तालिका अथवा स्तम्भकारको आलेख शैलीमा आउने हो भन्ने सीमा तोक्दा नतिजा व्यवस्थित बन्छ। यससँगै भाषाको शैली र प्रस्तुति (Tone & Style) निकै संवेदनशील पक्ष हो। सामग्रीलाई कृत्रिम वा रोबोटिक नदेखाई मानवीय र स्वाभाविक (Humanized) बनाउन पत्रकारिताको मापदण्ड, गाम्भीर्य वा आवश्यकताअनुसारको टोन प्रम्प्टमै तोकिदिनु पर्छ। यति मात्र नभई एआईले के कुरा लेख्नु हुँदैन वा कति शब्दको सीमामा बस्नुपर्छ भन्ने प्रतिबन्ध वा सर्तहरू (Constraints) बाँधिदिँदा अनावश्यक विस्तार रोकिन्छ। अझ आफूले चाहेको ढाँचाको सानो नमुना वा उदाहरण (Few-Shot Prompting) समेत समावेश गरिदिएमा एआईले प्रयोगकर्ताको अपेक्षाअनुसार शतप्रतिशत दुरुस्त र परिपक्व नतिजा प्रस्तुत गर्दछ।