गोरखा, असाेज २५ गते । उत्तरी गोरखाको चुमनुव्री गाउँपालिकामा आइतबार बिहान बुढीगण्डकी नदीमा एक्कासि उर्लिएर आएको भीषण बाढीले तटीय बस्तीहरूमा वितण्डा मच्चाएको छ। बुढीगण्डकीको सहायक स्यार र उग्युलुङ खोला पहिरोले थुनिएर अचानक फुट्दा आएको बाढीले चुमनुव्री–३ का १० भन्दा बढी घर र आवागमन जोड्ने प्रमुख झोलुङ्गे पुल बगाएको छ।
चुमनुव्री–३ का वडाध्यक्ष रामकुमार गुरुङका अनुसार वडाभित्र पर्ने सल्लेरी, पैयुँका र जगत बगर क्षेत्रका घरहरू बाढीले सोहोरेर लगेको हो। आइतबार बिहानै बस्तीमा बाढी पसेपछि स्थानीय बासिन्दाहरू घरभित्रका अन्नपात र लत्ताकपडासमेत झिक्न नभ्याई ज्यान जोगाउन भागाभाग गर्दै सुरक्षित डाँडातर्फ उक्लिएका थिए। स्थानीय बासिन्दा समयमै भाग्न सफल भएका कारण अहिलेसम्म मानवीय क्षतिको विवरण भने आएको छैन।
बाढीले वडा नम्बर ३ जोड्ने झोलुङ्गे पुल बगाइदिएपछि तल्लो र माथिल्लो भेगबीचको पैदल सम्पर्क पूर्ण रूपमा विच्छेद भएको छ। नदीको सतह अझै पनि तीव्र रूपमा घटबढ भइरहेको र विकट भूगोलका कारण क्षतिको पूर्ण विवरण संकलन गर्न कठिनाइ भइरहेको स्थानीय प्रशासनले जनाएको छ। सम्भावित थप जोखिमलाई मध्यनजर गर्दै तटीय क्षेत्रका अन्य बस्तीहरूमा समेत उच्च सतर्कता अपनाउन भनिएको छ।
