महावै गाउँपालिकाको सभाहलमा जनप्रतिनिधि, शाखाका कर्मचारी र स्थानीय विद्यालयका शिक्षकहरूलाई एकै ठाउँमा राखेर प्रमुख जिल्ला अधिकारी छविराज भट्टराईले चाडपर्वको बहाना बनाएर नागरिकको सेवामा कुनै पनि किसिमको सम्झौता नगर्न स्पष्ट निर्देशन दिनुभयो। दुर्गमका बासिन्दा पालिका वा वडा कार्यालयमा सेवा लिन आउँदा कर्मचारी नभेटिने, काममा ढिलासुस्ती गर्ने वा बहानाबाजी गरेर फर्काउने पुरानो रोग दोहोरिए कडा कानुनी कारबाही हुने चेतावनी प्रजिअले दिनुभएको छ। साथै, विद्यालयमा शिक्षकहरूको नियमित उपस्थिति र शैक्षिक वातावरण चुस्त राख्ने विषयमा पनि टोलीले कडा खबरदारी गरेको छ।