कार्यक्रममा आफ्नो धारणा राख्दै किर्डाक नेपालका सिनियर परियोजना स‌ंयाेजक बलिराज शाहीले प्रारम्भिक बालविकास कक्षा शिक्षा नै बालबालिकाको भविष्य निर्माणको आधारशीला भएको औंल्याउनुभयो। उहाँले भन्नुभयो, “कक्षा १ देखि ३ सम्मका बालबालिकामा गरिने लगानी नै वास्तवमा उनीहरूको सुरक्षित भविष्य निर्माण गर्नु हो। तर हाम्रो अभ्यासमा माथिल्लो तहका ठूला कक्षाहरूमा मात्र लगानी र ध्यान केन्द्रित गरिँदा आधारभूत तह कमजोर भई उपलब्धिमूलक नतिजा आउन सकिरहेको छैन।”

तालिमले शिक्षण शैलीमा नयाँ दृष्टिकोण दिएको सहभागी शिक्षकहरूले बताएका छन्। जनज्योति माध्यमिक विद्यालय तिकुवा (वडा नं. ४) का शिक्षक दिलबहादुर बोहराले तालिम निकै लाभदायक भएको प्रतिक्रिया दिँदै भन्नुभयो, “यस तालिमले हाम्रो शिक्षण कलामा थप निखार ल्याएको छ। यस्ता व्यावहारिक कार्यक्रमहरू अझै आवश्यक छन् र तालिममा तयार पारिएको कार्ययोजनालाई हामी विद्यालयमा कडाइका साथ लागू गर्नेछौँ।”

यस्तै, बढरुख आधारभूत विद्यालय, सान्नीत्रिवेणी–६ मेहलमुडीकी शिक्षिका यशोदा सार्की र पञ्चदेवल माध्यमिक विद्यालय मेहलमुडीकी शिक्षिका शान्तिदेवी शाहले तालिम अवधिभर सिकेका लैङ्गिक रूपान्तरणमुखी विधि र बालमैत्री अभ्यासहरू विद्यालयमा पुगेर बालबालिकामाझ पूर्ण रूपमा कार्यान्वयन गर्ने प्रतिबद्धता जनाउनुभयो।

नरहरिनाथ गाउँपालिका–२ स्थित चौँथीकोट आधारभूत विद्यालयका शिक्षक जनके दमाईले ५ दिने प्रशिक्षणले कक्षाकोठाभित्रका विविधता बुझ्न ठूलो मद्दत पुर्‍याएको बताउँदै भन्नुभयो, “पाँच दिनको यो तालिमले हामीलाई धेरै नयाँ ज्ञान र सीप सिकायो। अब हामीले तालिम हलबाट लगेको यो सीप र दक्षता विद्यालयको कक्षाकोठामा व्यवहारमै उतारेर देखाउने बेला आएको छ।”

समापनका क्रममा सहभागीहरूले तयार पारेको सूक्ष्म शिक्षण (Micro-teaching) र कार्ययोजनाअनुसार आफ्ना विद्यालयमा समावेशी तथा सुरक्षित सिकाइ वातावरण निर्माण गर्ने प्रतिबद्धता व्यक्त गरेका छन्।