कालीकोट, भाद्र २३ गते। कालीकोटका विभिन्न स्थानीय तहका विद्यालयहरूमा कक्षा ६ मा अध्ययनरत छात्राहरूलाई पाठेघरको मुखको क्यान्सरविरुद्ध ‘एचपिभी’ (HPV) खोप निःशुल्क प्रदान गरिने भएको छ।
कर्णाली प्रदेश सरकार, सामाजिक विकास मन्त्रालय, स्वास्थ्य सेवा निर्देशनालयअन्तर्गत स्वास्थ्य सेवा कार्यालय कालीकोटले एक सूचना जारी गर्दै खोप अभियानको स्थानीय तहगत तालिका सार्वजनिक गरेको हो। महिलाहरूमा देखिने पाठेघरको मुखको क्यान्सरको मुख्य कारण ‘ह्युमन प्यापिलोमा भाइरस’ (HPV) भएकाले यसको संक्रमणबाट सुरक्षित राख्न यो खोप प्रभावकारी र दीर्घकालीन सुरक्षाका लागि महत्त्वपूर्ण मानिन्छ।
कार्यालयद्वारा जारी तालिकाअनुसार सम्बन्धित स्थानीय तहका तोकिएका विद्यालयहरूमा निम्न मितिमा खोप सेवा सञ्चालन हुनेछ:
२०८३ भदौ २४ र २५ गते: नरहरीनाथ गाउँपालिका, सान्नीत्रिवेणी गाउँपालिका, महावै गाउँपालिका, तिलागुफा नगरपालिका र पचालझरना गाउँपालिका
२०८३ भदौ २५ र २६ गते: रास्कोट नगरपालिका र शुभकालिका गाउँपालिका
२०८३ भदौ ३१ गते: खाँडाचक्र नगरपालिका
‘आजको खोप, भोलिको सुरक्षित भविष्य’ भन्ने मूल नाराका साथ सञ्चालन हुन लागेको यस अभियानमा कक्षा ६ मा अध्ययनरत सम्पूर्ण छात्राहरूलाई निर्धक्क भएर खोप सेवा लिन तथा आफ्ना बालबालिकालाई खोप दिलाउन अभिभावक एवं विद्यालय प्रशासनलाई स्वास्थ्य सेवा कार्यालयले आह्वान गरेको छ।
