कालीकाेट भाद्र २३ गते । जल तथा मौसम विज्ञान विभागले आज (२०८३ भदौ २३ गते, मंगलबार) को मौसम पूर्वानुमान बुलेटिन जारी गर्दै देशका धेरैजसो भू-भागमा मेघगर्जन र चट्याङ्गसहित वर्षाको सम्भावना रहेको जनाएको छ।
दिउँसोको मौसम अवस्था
विभागका अनुसार आज दिउँसो कोशी, बागमती र गण्डकी प्रदेशका हिमाली भू-भागका केही स्थानहरू तथा लुम्बिनी, कर्णाली र सुदूरपश्चिम प्रदेशको हिमाली भू-भागका थोरै स्थानहरूमा मेघगर्जन/चट्याङ्गसहित मध्यम वर्षा तथा हिमपातको सम्भावना रहेको छ।
यस्तै, कोशी, बागमती, गण्डकी र लुम्बिनी प्रदेशको पहाडी भू-भागका धेरै स्थानमा तथा कर्णाली र सुदूरपश्चिम प्रदेशको पहाडी भू-भागका केही स्थानमा मध्यम वर्षाको प्रक्षेपण गरिएको छ। देशका तराई भू-भागका केही स्थानहरूमा समेत वर्षाको सम्भावना रहेको छ।
विशेषगरी कोशी, बागमती र गण्डकी प्रदेशको हिमाली, पहाडी र तराई भू-भाग तथा लुम्बिनी प्रदेशको पहाडी र तराई भू-भागका एक-दुई स्थानमा भारी वर्षाको सम्भावना रहेकाले आवश्यक सतर्कता अपनाउन अनुरोध गरिएको छ।
रातिको मौसम अवस्था
आज राति कोशी, बागमती र गण्डकी प्रदेशका हिमाली तथा पहाडी भू-भागका केही स्थानमा र लुम्बिनी, कर्णाली तथा सुदूरपश्चिम प्रदेशको हिमाली र पहाडी भू-भागका थोरै स्थानमा मेघगर्जन/चट्याङ्गसहित वर्षा/हिमपात हुनेछ।
मधेश, कोशी, बागमती र गण्डकी प्रदेशको तराई क्षेत्रका केही स्थान तथा लुम्बिनी र सुदूरपश्चिम प्रदेशको तराईका थोरै स्थानमा मध्यम वर्षाको सम्भावना रहेको छ। रातिको समयमा मधेश प्रदेश तथा कोशी, बागमती र गण्डकी प्रदेशको पहाडी र तराई भू-भागका एक-दुई स्थानमा भारी वर्षाको आकलन गरिएको छ।
