बाढी प्रभावित नागरिकहरूका लागि स्थापित होल्डिङ सेन्टरहरूमा हाल नुवाकोटमा २४६६, काठमाडौँमा ३२९, रसुवामा ३९८ र धादिङमा २६० जना आश्रित रहेका छन्। उनीहरूका लागि ३७ वटा ट्रक, ३७ वटा बोलेरो र ९ वटा हेलिकप्टर उडानमार्फत निरन्तर खाद्य तथा गैरखाद्य सामग्री पठाइएको छ। साथै, सशस्त्र प्रहरीद्वारा हालसम्म ७७ वटा उडानमार्फत राहत सामग्री ढुवानी गरिएको छ। जसअन्तर्गत आज भदौ १६ गते नुवाकोटमा १६ उडानबाट ८ स्थानमा र रसुवामा ११ उडानबाट ११ स्थानमा राहत पुर्‍याइएको छ। सरकारले राहतस्वरूप रसुवा र नुवाकोटलाई १–१ करोड, धादिङलाई ५० लाख र प्रभावित १५ पालिकाका लागि कुल ६ करोड ७५ लाख रुपैयाँ नगद बजेट उपलब्ध गराएको छ।