वीरेन्द्रनगर ६ भाद्र। सुर्खेती लोक संस्कृतिका सशक्त सर्जक तथा कलाकार हरि विष्टको बहुचर्चित सांगीतिक श्रृङ्खला ‘सम्झना माइतीको-१४’ डिजिटल बजारमा सार्वजनिक भएको छ। नेपाली नारीहरूको महान् पर्व हरितालिका तीजको अवसर पारेर तयार पारिएको यो मौलिक सिर्जना सार्वजनिक भएसँगै स्रोता तथा दर्शकहरूको भरपूर माया र प्रशंसा पाइरहेको छ।
लोकप्रिय गायिका टीका पुनको जादुमयी र मर्मस्पर्शी स्वरमा सजिएको यस गीतमा विष्ट स्वयम्को शब्द संयोजन तथा मौलिक लय सिर्जना रहेको छ। नेपाली समाजमा तीजको समयमा चेलीबेटीले माइतीघर, आमाबुवा र सङ्गीहरूलाई सम्झेर पोख्ने आत्मीय भाव, खुसी र वेदनाको यथार्थपरक चित्रण गीतमा पोखिएको छ। विकृति र भड्किलोपनतर्फ ढल्किँदै गएको आधुनिक तीज गीतको भीडमा यस गीतले विशुद्ध नेपालीपन र मौलिकताको रक्षा गरेको छ।
हालसम्म लोकदोहोरी, तीज तथा आधुनिक गरी ५० भन्दा बढी गीतहरू बजारमा ल्याइसकेका सर्जक हरि विष्टका अघिल्ला १३ वटै भागहरू जस्तै ‘सम्झना माइतीको-१४’ ले पनि स्रोताहरूको मन जित्ने अपेक्षा गरिएको छ।
नेपाली लोक संस्कृतिको प्रवर्द्धन र मौलिक तीजको आभास दिलाउने यस सुन्दर गीतलाई हेरेर तथा सुनेर लाइक, कमेन्ट र सेयर गरी कलाकारहरूलाई हौसला प्रदान गर्न सर्जक विष्टले सम्पूर्ण दर्शक तथा स्रोतामाझ हार्दिक अनुरोध गर्नुभएको छ।
