कालीकाेट ४ भाद्र। कालीकोटको तिलागुफा नगरपालिकामा क्रिकेट खेलको विकास, प्रवर्द्धन तथा स्थानीय खेलाडीहरूको क्षमता अभिवृद्धिका लागि नगरस्तरीय तदर्थ समिति गठन गरिएको छ।
नगर प्रमुख तथा नगर शिक्षा समितिका संयोजक शंकरप्रसाद उपाध्यायको अध्यक्षतामा सम्पन्न नगरपालिका स्तरीय भेलाले नरेश शाहीको संयोजकत्वमा २५ सदस्यीय ‘तिलागुफा नगरपालिका स्तरीय क्रिकेट संघ’ को तदर्थ समिति सर्वसम्मत रूपमा गठन गरेको हो।
नगरपालिकाभित्र पछिल्लो समय युवाहरूमा क्रिकेट खेलप्रति आकर्षण बढ्दै गएकाले त्यसलाई व्यवस्थित बनाउन यो पहल गरिएको हो। नवगठित समितिले स्थानीयस्तरमा लुकेर रहेका खेल प्रतिभाको पहिचान गर्ने, नयाँ खेलाडी उत्पादन गर्ने तथा आगामी दिनमा नगर तथा जिल्लास्तरीय खेलकुद प्रतियोगिताहरू सञ्चालन गर्न महत्त्वपूर्ण भूमिका खेल्ने अपेक्षा राखिएको छ।
भेलाका अध्यक्ष तथा नगर प्रमुख उपाध्यायले नवगठित तदर्थ समितिका संयोजक नरेश शाहीलगायत सम्पूर्ण पदाधिकारी तथा सदस्यहरूलाई बधाई दिँदै सफल कार्यकालको शुभकामना व्यक्त गर्नुभयो। यो समितिले तिलागुफाको क्रिकेट विकास र खेलाडीहरूको उज्ज्वल भविष्यका लागि कोशेढुङ्गाको रूपमा काम गर्ने विश्वास लिइएको छ।
