जलमापन केन्द्रहरू बगेपछि नयाँ प्रविधि प्रयोग गरिएको छ। नेपालमै पहिलोपटक टिमुरेमा सीसीटीभी क्यामेरा जडान गरी बाढीको प्रत्यक्ष निगरानी सुरु गरिएको छ। यो क्यामेरा नदीभन्दा ७० मिटर माथि राखिएको छ। यसको प्रत्यक्ष दृश्य २४ सै घण्टा बाढी पूर्वानुमान महाशाखामा हेर्न सकिन्छ।

जलवायु परिवर्तनका कारण हिमाली क्षेत्रमा हिमपहिरोको जोखिम बढेको छ। परम्परागत वर्षा मापन प्रणाली यस्ता आकस्मिक बाढीका लागि अपर्याप्त हुन्छन्। त्यसैले हिमाली नदीहरूमा सीसीटीभी र स्याटेलाइट निगरानी बढाउनुपर्ने देखिन्छ। माथिल्लो क्षेत्रमा बनेका तालहरूको नियमित अनुगमन र पूर्वतयारीलाई निरन्तरता दिनु आवश्यक छ।