काठमाडौँ, जेठ १७ – नेपालको सूचना प्रविधि र मोबाइल व्यवसायको क्षेत्रमा एक महत्वपूर्ण परिघटनाका रूपमा क्यान महासंघ (CAN Federation) र नेपाल मोबाइल डिस्ट्रिब्युटर्स एशोसिएशन (NMDA) बीच संस्थागत सहकार्यको औपचारिक सुरुवात भएको छ। मोबाइल उद्योगको दिगो विकास र यस क्षेत्रमा विद्यमान जटिल चुनौतीहरूको निराकरण गर्ने उद्देश्यले दुई संस्थाले हात मिलाएका हुन्।
आज आइतबार क्यान महासंघको खुसिबुस्थित केन्द्रीय कार्यालयमा आयोजित एक उच्चस्तरीय ‘संस्थागत गठबन्धन’ बैठकले नेपाली मोबाइल बजारलाई थप सुरक्षित, पारदर्शी र व्यवस्थित बनाउन राज्यस्तरमै बलियो पैरवी गर्ने साझा प्रतिबद्धता व्यक्त गरेको छ।
अवैध आयात (ग्रे मार्केट) विरुद्ध साझा आवाज बैठकको केन्द्रविन्दुमा मुलुकको अर्थतन्त्रमा असर पुर्याइरहेको ‘ग्रे मार्केट’ वा अनधिकृत च्यानलबाट भित्रिने मोबाइलको समस्या रहेको थियो। यसले राज्यको राजस्वमा ठूलो क्षति पुर्याउनुका साथै वैधानिक व्यवसायीहरूलाई प्रत्यक्ष मारमा पारेको निष्कर्ष निकाल्दै दुवै संस्थाले यस विरुद्ध संयुक्त रूपमा आवाज उठाउने निर्णय गरेका छन्।
क्यान महासंघका कार्यवाहक अध्यक्ष चिरन्जीवी अधिकारीले प्रविधि क्षेत्र देशको अर्थतन्त्रको मेरुदण्ड बनिसकेको अवस्थामा भित्रिएका बेथिति अन्त्य गर्न दुवै संस्थाको हातेमालो अपरिहार्य रहेको बताउनुभयो। उहाँले भन्नुभयो, “अवैध आयातले सिर्जना गरेको अस्वस्थ प्रतिस्पर्धालाई चिर्दै वैधानिक व्यवसायीको संरक्षण गर्नु हाम्रो प्राथमिक दायित्व हो।”
त्यस्तै, एनएमडिएका अध्यक्ष रघु त्रिपाठीले मोबाइल डिभाइस म्यानेजमेन्ट सिस्टम (MDMS) को प्रभावकारी कार्यान्वयन र व्यावहारिक आयात नीतिको पैरवीमा क्यान महासंघसँगको यो गठबन्धनले थप ऊर्जा थपेको उल्लेख गर्नुभयो।
रणनीतिक कार्यदिशा र प्राथमिकता बैठकले आगामी दिनमा मोबाइल इकोसिस्टम सुधारका लागि निम्न तीनवटा मुख्य एजेन्डाहरूलाई अघि बढाउने निर्णय गरेको छ:
संस्थागत तालमेल: दुवै संस्थाका कार्यसमितिबीच कार्यदिशाको संरेखण (Alignment) गरी साझा लक्ष्य प्राप्तितर्फ अग्रसर हुने।
नीतिगत पैरवी: मोबाइल उद्योगको नियमन र नीतिगत स्पष्टताका लागि राज्यका निकायमा सशक्त पैरवी गर्ने।
दीर्घकालीन रोडम्याप: नेपालको मोबाइल र हार्डवेयर इकोसिस्टमलाई अन्तर्राष्ट्रिय मापदण्डअनुरूप व्यवस्थित गर्न ठोस योजनासहितको कार्यतालिका तयार गर्ने।
यस महत्वपूर्ण बैठकमा क्यान महासंघका तर्फबाट कार्यवाहक अध्यक्ष चिरन्जीवी अधिकारीसहित महासचिव, कोषाध्यक्ष र १५ औँ कार्यसमितिका सदस्यहरूको सहभागिता थियो। त्यस्तै, एनएमडिएका तर्फबाट अध्यक्ष रघु त्रिपाठी, निवर्तमान अध्यक्ष, उपाध्यक्ष, महासचिव र कोषाध्यक्ष लगायतका उच्च नेतृत्वको उपस्थिति रहेको थियो।
दशौं हजार व्यवसायी र आईटी क्षेत्रको प्रतिनिधित्व गर्ने यी दुई संस्थाको यो सहकार्यले नेपाली मोबाइल बजारमा देखिएका नीतिगत अन्योल र अवैध आयातको समस्यालाई सम्बोधन गर्न महत्वपूर्ण भूमिका खेल्ने विश्वास लिइएको छ।
