यस पोर्टलको सबैभन्दा सबल पक्ष भनेको यसमा उपलब्ध सामग्रीहरूको विविधता हो। यहाँ कक्षा १ देखि १० सम्मका विद्यार्थीहरूका लागि अनिवार्य विषयका सम्पूर्ण पाठ्यसामग्रीहरू भिडियो, अडियो र अन्तरक्रियात्मक खेलका रूपमा सङ्ग्रहित छन्। प्रत्येक कक्षाका कठिन मानिने गणित, विज्ञान र अंग्रेजी जस्ता विषयहरू अनुभवी शिक्षकहरूले भिडियोमार्फत बुझाएका छन् भने साना कक्षाका बालबालिकाका लागि चित्र, एनिमेसन र खेलका माध्यमबाट अक्षर र अंक चिनाउने रोचक सामग्रीहरू राखिएका छन्। विद्यार्थीले आफूलाई आवश्यक पर्ने सन्दर्भ पुस्तकहरू ई–पुस्तकालयबाट डाउनलोड गर्न सक्नेछन् भने पाठ पढिसकेपछि नमुना प्रश्नपत्रहरू हल गरेर आफ्नो सिकाइ स्तर आफैँ जाँच्न समेत पाउने व्यवस्था गरिएको छ।