स्वास्थ्य सेवामा सुधार आए पनि पूर्वाधार र स्रोतको अभाव अझै पनि एउटा ठुलो तगारो बनेको छ। कालीकोट अस्पतालमा अझै पनि आफ्नै ‘ब्लड बैंक’ छैन। जुनिताको शल्यक्रिया गर्दा पनि रगतको जोहो गर्न चिकित्सकहरूलाई निकै हम्मे-हम्मे परेको थियो।

“रगत अभावका कारण शल्यक्रियामा कठिनाइ हुने गरेको छ,” डा. पाण्डेले बाध्यता सुनाए, “अहिले कर्णाली स्वास्थ्य विज्ञान प्रतिष्ठानबाट पोस्टिङमा आएका विद्यार्थीहरूलाई रगत दिन तयार राखेर मात्र हामीले शल्यक्रिया गर्नुपरेको अवस्था छ।” यो एउटा यस्तो जोखिमपूर्ण वास्तविकता हो, जहाँ चिकित्सकहरूले प्राविधिक सुविधाभन्दा बढी साहसको भरमा ज्यान जोगाइरहेका छन्।

पहिलेको तुलनामा अहिले गर्भवती अवस्थामा हुने जटिल समस्याहरूको उपचार सहज भएको छ। तर, कालीकोट जस्ता दुर्गम जिल्लाहरूमा ‘ब्लड बैंक’ जस्ता आधारभूत सुविधा नहुँदा अझै पनि जोखिम पूर्ण रूपमा टरेको छैन।

यद्यपि, जुनिता जस्ता कैयौँ आमाहरूले जिल्लामै पाएको यो सफल उपचारले कालीकोटको स्वास्थ्य क्षेत्रमा एउटा सकारात्मक क्रान्तिको संकेत गरेको छ। राज्यले अब जनशक्तिसँगै आवश्यक भौतिक पूर्वाधार र रगत व्यवस्थापनमा ध्यान दिने हो भने, कर्णालीका कुनै पनि आमाले अब सन्तान जन्माउँदा अकालमै ज्यान गुमाउनु पर्ने छैन।