प्रतिकूल मौसम र हिमपातको उच्च जोखिमलाई दृष्टिगत गरी कालीकोट हुँदै रारा ताल जाने पर्यटकहरूको यात्रा तत्कालका लागि स्थगित गर्न आग्रह गरिएको छ। मौसम र सडकको अवस्था सामान्य भएपछि मात्र सम्बन्धित निकायसँग समन्वय गरेर यात्रा सञ्चालन गर्न निर्णय गरिएको छ। यसैगरी, नदी तथा खोला तटीय क्षेत्रका बासिन्दालाई सम्भावित जोखिमबारे पूर्वसूचना दिई आवश्यक परे सुरक्षित स्थानमा जान भनिएको छ।

विपद् व्यवस्थापनका लागि जिल्लास्थित नेपाली सेना, नेपाल प्रहरी तथा सशस्त्र प्रहरी बलका विपद् उद्धार टोली (Search and Rescue Team) लाई उच्च सतर्कता (High Alert) मा राखिएको छ। यस्तै, नेपाल रेडक्रस सोसाइटी, हुरेन्डेक नेपाल, किर्डाक नेपाल, आइएनएफलगायतका गैरसरकारी संस्थाहरूसँग समन्वय गरी त्रिपाल, खाद्यान्न र औषधिको मौज्दात सुनिश्चित गर्ने निर्णय भएको छ। विपद्बाट हुनसक्ने सम्भावित घाइतेहरूको उपचारका लागि जिल्ला अस्पताल, प्राथमिक स्वास्थ्य केन्द्र तथा स्वास्थ्य चौकीहरूलाई आवश्यक औषधि र जनशक्तिसहित तयारी अवस्थामा रहन निर्देशन दिइएको छ।

हावाहुरी, चट्याङ्ग तथा पहिरोका कारण विद्युत् पोल, सञ्चारका तार तथा खानेपानीका पाइपमा क्षति पुगेमा तत्काल मर्मत तथा पुनःस्थापना गर्न सम्बन्धित निकायलाई भनिएको छ। साथै, विद्युत् पहुँच नपुगेका महावै, नरहरिनाथ, पलाँता गाउँपालिका तथा तिलागुफा नगरपालिकामा तत्काल विद्युतीकरण गर्न नेपाल विद्युत् प्राधिकरण, खाद्यान्नको सहज आपूर्तिका लागि खाद्य व्यवस्था तथा व्यापार कम्पनी लिमिटेड र सञ्चार सेवा अवरुद्ध हुन नदिन नेपाल टेलिकमलाई आवश्यक पहल गर्न निर्देशन दिइएको छ।

बैठकले रसुवा भोटेकोशी बाढीमा बेपत्ता भएका कालीकोटका नागरिकहरूको आधिकारिक विवरण यकिन गरी यथाशीघ्र पठाउन सम्बन्धित स्थानीय तहलाई पुनः अनुरोध गर्ने निर्णय समेत गरेको छ।