यद्यपि, बाह्य क्षेत्रमा देखिएको यो उत्साहजनक चित्रको विपरीत देशको आन्तरिक अर्थतन्त्र भने अझै शिथिल अवस्थाबाट गुज्रिरहेको छ। बैंक तथा वित्तीय संस्थाहरूमा निक्षेपको भारित औसत ब्याजदर ३.१५ प्रतिशत र कर्जाको भारित औसत ब्याजदर ६.४८ प्रतिशतसम्म ओर्लिँदा पनि निजी क्षेत्रबाट कर्जाको माग बढ्न सकेको छैन। साउन महिनामा निजी क्षेत्रमा प्रवाहित कर्जा जम्मा ०.४ प्रतिशतले मात्रै बढेको छ। वित्तीय बजारमा तरलता पर्याप्त रहेको र ब्याजदर ऐतिहासिक रूपमा सस्तो हुँदा समेत कर्जा प्रवाह नहुनुले उद्योगी तथा व्यवसायीहरूमा नयाँ लगानी गर्ने मनोबल अझै फर्कन नसकेको स्पष्ट पार्छ।