कालीकोट भाद्र २८ गते । जल तथा मौसम विज्ञान विभाग, मौसम पूर्वानुमान महाशाखाले आगामी तीन दिन देशका विभिन्न प्रदेशहरूमा मध्यमदेखि भारी वर्षाको सम्भावना रहेको जनाउँदै सतर्कता अपनाउन मौसम चेतावनी जारी गरेको छ। महाशाखाका अनुसार मनसुनी वायुको प्रभावका कारण विशेष गरी कोशी, बागमती, गण्डकी, कर्णाली र सुदूरपश्चिम प्रदेशका पहाडी तथा हिमाली भू-भागमा पहिरो र गेग्रान बहावको जोखिम उच्च रहेको छ।
मौसम पूर्वानुमान महाशाखाले जारी गरेको अद्यावधिक विवरण अनुसार भदौ २८ गते आइतबार दिउँसो कोशी, बागमती र गण्डकी प्रदेशका हिमाली तथा पहाडी भू-भागका साथै कर्णाली र सुदूरपश्चिम प्रदेशका पहाडी भू-भागका एक-दुई स्थानमा भारी वर्षाको सम्भावना रहेको छ भने रातिको समयमा कोशी प्रदेशको तराई क्षेत्रका केही स्थानमा भारी वर्षा हुन सक्छ।
यसै गरी भदौ २९ गते सोमबार दिउँसो कोशी, बागमती र गण्डकी प्रदेशका हिमाली तथा पहाडी क्षेत्रसँगै लुम्बिनी र कर्णालीका पहाडी भू-भागका एक-दुई स्थानमा भारी वर्षाको आंकलन गरिएको छ। सोमबार राति भने मुख्य गरी लुम्बिनी प्रदेशको तराई क्षेत्रमा भारी वर्षाको जोखिम रहेको छ।
मंगलबार भदौ ३० गते पनि वर्षाको क्रम जारी रहनेछ, जसअन्तर्गत दिउँसो कोशी प्रदेशका हिमाली तथा पहाडी क्षेत्रका साथै बागमती, गण्डकी र लुम्बिनीका पहाडी र तराई भू-भागका एक-दुई स्थानमा भारी वर्षा हुनेछ भने सोही दिन राति मधेश र कोशी प्रदेशका तराई भू-भागमा वर्षाको सम्भावना औँल्याइएको छ।
निरन्तरको वर्षाका कारण पहाडी इलाकामा पहिरो खस्ने, सडक सञ्जाल अवरुद्ध हुने र नदीनाला तथा खहरे खोलाहरूमा अचानक बहाव बढ्न सक्ने भएकाले यात्रा गर्दा वा नदी तटीय क्षेत्रमा बसोबास गर्दा उच्च सावधानी अपनाउन स्थानीय प्रशासनले आग्रह गरेको छ। सम्भावित विपद्को जोखिमबाट बच्न पूर्वतयारीलाई चुस्त राख्नुका साथै नागरिकहरूले मौसमसम्बन्धी आधिकारिक सूचनालाई पछ्याउँदै आवश्यक पूर्वसतर्कता अपनाउनु नै बुद्धिमानी हुने देखिन्छ।
