जुम्ला ३१ असार । कर्णाली क्षेत्रको यातायात पूर्वाधारलाई सुदृढ र सुरक्षित बनाउने उद्देश्यका साथ सडक डिभिजन कार्यालय जुम्लाले विभिन्न सात वटा सडक आयोजना निर्माण तथा स्तरोन्नतिका लागि बोलपत्र (ठेक्का) आह्वान गरेको छ। नेपाल सरकारको भौतिक पूर्वाधार विकास मन्त्रालय, सडक विभाग अन्तर्गतको संघीय सडक सुपरिवेक्षण तथा अनुगमन कार्यालय सुर्खेत मातहत रहेको सडक डिभिजन जुम्लाले चालु आर्थिक वर्ष २०८३/०८४ का लागि आज असार ३१ गते सार्वजनिक सूचना जारी गर्दै खुला प्रतिस्पर्धात्मक इलेक्ट्रोनिक बोलपत्र आह्वान गरेको हो।्
डिभिजन कार्यालयले कर्णाली राजमार्गसहित यस क्षेत्रका रणनीतिक महत्वका सडक खण्डहरूको सुधार, मर्मत र कालोपत्रेका लागि प्रक्रिया अघि बढाएको छ। जसअन्तर्गत थार्मारे-चौरजहारी-जाजरकोट खलङ्गा-जुम्ला कुँदारी-मुगु रारा सडक, खलङ्गा जुम्ला खाली भुल्भुले ताल्चा रारा सडक तथा मनाङ मुस्ताङ डोल्पा जुम्ला सडक खण्डमा संरचनागत कामसहित सडक सुधार तथा स्तरोन्नति गरिनेछ। यसैगरी मुगुस्थित रारा राजमार्गको ताल्चादेखि सल्लेरी खण्ड र जुम्लाको देवारगाउँदेखि आचार्यलिही खण्डमा कालोपत्रे (ब्ल्याकटप) गरिनेछ भने कर्णाली राजमार्गको सेरिघाट-मान्म बजार र नाग्मा-जुम्ला खण्डमा सडक मार्किङ (रोड मार्किङ) को काम हुनेछ। कर्णाली राजमार्गकै नाग्मा-जुम्ला खण्डमा क्रस ड्रेनेज अन्तर्गत स्ल्याब कल्भर्ट र कजवे निर्माणका लागिसमेत ठेक्का खोलिएको छ।
सडक डिभिजन प्रमुखका अनुसार योग्य बोलपत्रदाताहरूले आगामी भदौ २० गते मध्यान्ह १२ बजेसम्म विद्युतीय माध्यमबाट आफ्ना प्रस्तावहरू बुझाउन सक्नेछन् भने सोही दिन दिउँसो १ बजे बोलपत्र खोलिने कार्यतालिका तय गरिएको छ। इच्छुक निर्माण व्यवसायीहरूले यस ठेक्का सम्बन्धी विस्तृत विवरण र कागजातका लागि सार्वजनिक खरिद अनुगमन कार्यालय (PPMO) को आधिकारिक वेबसाइट वा सडक डिभिजन जुम्लाको सूचना पाटी हेर्न सक्ने कार्यालयले जनाएको छ। यी आयोजनाहरू समयमै सम्पन्न भएमा कालीकोट, जुम्ला, मुगु र डोल्पा लगायतका जिल्लाका नागरिकको यात्रा अझ सहज र सुरक्षित हुने विश्वास लिइएको छ।
