स्थानीय सरकार सञ्चालन ऐन, २०७४ ले निर्दिष्ट गरेको नागरिकको हित संरक्षण र स्थानीय विकास निर्माणमा समन्वय गर्ने अधिकारको प्रयोग गर्दै रास्कोट नगरपालिकाले अब थप सम्झौताहीन ढंगले अघि बढ्ने स्पष्ट पारेको छ। नगर प्रमुख धर्मराज शाहीद्वारा हस्ताक्षरित अपिलमा आगामी आर्थिक वर्ष २०८३/०८४ को सुरुवातदेखि नै निर्माण व्यवसायी के.एस. शनिदेव जे.भी. ले निर्माण स्थलमा पूर्ण रूपमा परिचालन भई कालोपत्रे कार्यलाई तीव्रता नदिएमा कडा कानुनी प्रक्रिया अघि बढाइने उल्लेख छ। नयाँ आर्थिक वर्षको सुरुवातमा पनि चित्तबुझ्दो प्रगति हासिल नभए प्रचलित सार्वजनिक खरिद ऐन, सार्वजनिक खरिद नियमावली तथा ठेक्का सम्झौताका सर्त बमोजिम ठेक्का सम्झौता अन्त्य गर्ने (ठेक्का तोड्ने) लगायतका कानुनी कारबाहीका लागि सम्बन्धित नियमनकारी निकायमा औपचारिक रूपमा सिफारिस गरिने नगरपालिकाले चेतावनी दिएको छ। रास्कोटबासीको सहज, सुरक्षित र गुणस्तरीय सडक पहुँच सुनिश्चित गर्नु आफ्नो मुख्य प्राथमिकता रहेको भन्दै नगरपालिकाले यस कार्यका लागि निरन्तर पहल गरिरहने प्रतिबद्धता समेत व्यक्त गरेको छ।