यो घटनाको केही घण्टा बित्न नपाउँदै कर्णाली नदीकै अर्को स्थानमा पनि पुनः अर्को शव फेला परेको छ। आजै बिहान करिब १०:०० बजेको समयमा कैलालीकै लम्कीचुहा नगरपालिका वडा नम्बर ३ चिसापानी स्थित गोरङ्गे भन्ने ठाउँमा कर्णाली नदीमा अर्को लास रहेको सूचना स्थानीयले प्रहरीलाई दिएका थिए। जानकारी पाउनासाथ इलाका प्रहरी कार्यालय चिसापानी कैलालीबाट प्रहरी सहायक निरीक्षक (असिई) लक्ष्मण जैसीको कमाण्डमा तीन जनाको प्रहरी टोली तत्कालै घटनास्थलमा पुगेको थियो। इलाका प्रहरी कार्यालय चिसापानीबाट अन्दाजी ४ किलोमिटर पश्चिम-दक्षिण पर्ने उक्त स्थानमा प्रहरीले अनुसन्धान गर्दा नाम, थर र वतन पहिचान हुन नसकेकी अन्दाजी १७ देखि १८ वर्षकी एक महिला (किशोरी) को मृत शव नाङ्गो र पानीमा उत्तानो परेको अवस्थामा फेला पारेको हो। दुवै मृतकको पहिचान खुल्न नसकेकाले उनीहरू कहाँबाट बगेर आएका हुन् वा घटनाको प्रकृति के हो भन्नेबारे स्थानीय प्रहरीले थप कानुनी प्रक्रिया र विस्तृत अनुसन्धान अगाडि बढाएको जनाएको छ।