सुदूरपश्चिमको आर्थिक सम्भावनालाई थप बलियो बनाउन केबलकार परियोजनाबाहेक बैतडीमा सिमेन्ट उद्योग र बझाङमा जलविद्युत् आयोजना अघि बढाउने दिशामा आवश्यक अध्ययन तथा तयारी तीव्र रूपमा भइरहेको समेत उनले सार्वजनिक गरेका छन्। केही दिनअघि मात्रै कैलाली, अछाम, डडेलधुरा, बैतडी हुँदै बझाङसम्मको आफ्नो भ्रमणका क्रममा स्थानीय जनप्रतिनिधि, व्यवसायी तथा समुदायसँग आत्मीय संवाद गर्ने अवसर मिलेको उल्लेख गर्दै उनले यस यात्राले सुदूरपश्चिममा दीर्घकालीन लगानी विस्तार गर्ने आईएमई ग्रुपको विश्वासलाई अझ मजबुत बनाएको बताए। लगानी त्यहीँ पुग्छ जहाँ सम्भावना, विश्वास र सकारात्मक वातावरण हुन्छ भन्दै उनले निजी लगानी आकर्षित गर्न र आर्थिक गतिविधि बढाउन सुदूरपश्चिमका राजनीतिक दल, प्रदेश तथा स्थानीय सरकार र आम समुदायले देखाएको प्रतिबद्धताप्रति हृदयदेखि आभार व्यक्त गरे। नेपालको कुनै पनि भूगोल टाढा र कुनै पनि सम्भावना सानो नभएको जिकिर गर्दै अध्यक्ष ढकालले जहाँ सम्भावना हुन्छ, त्यहाँ लगानी गर्ने साहस र जहाँ विश्वास हुन्छ, त्यहाँ दीर्घकालीन सहयात्रा गर्ने प्रतिबद्धता नै आईएमई ग्रुपको मूल दर्शन रहेको र सुदूरपश्चिमसँगको सहयात्रा अब अझ व्यापक र अर्थपूर्ण बन्ने प्रतिबद्धता जनाएका छन्।