बजेट प्रस्तुत गर्दै चालु आर्थिक वर्ष २०८२/०८३ को विषयगत क्षेत्रको प्रगति समीक्षा समेत सार्वजनिक गरिएको छ, जसअनुसार चालु वर्षका लागि प्रक्षेपण गरिएको कुल ४५ करोड ९८ लाख २९ हजार ३ सय ५२ रुपैयाँ बजेटमध्ये हालसम्म २२ करोड १४ लाख ८१ हजार ५ सय ४८ रुपैयाँ अर्थात् ४८.१२ प्रतिशत मात्र खर्च हुन सकेको छ। विषयगत रूपमा हेर्दा सामाजिक विकासतर्फ ६९.४३ प्रतिशत र कार्यालय सञ्चालन तथा प्रशासनिक क्षेत्रमा ६२.७ प्रतिशत प्रगति हुँदा पूर्वाधार विकासतर्फ विनियोजित १२ करोड २४ लाख ८६ हजारमध्ये जम्मा २०.२६ प्रतिशत अर्थात् २ करोड ४८ लाख १२ हजार २ सय ५२ रुपैयाँ मात्र खर्च भएको देखिन्छ। त्यस्तै आर्थिक विकासतर्फ ८.७ प्रतिशत र सुशासनतर्फ ३०.३८ प्रतिशत मात्र खर्च भएको अवस्था छ। यद्यपि, आन्तरिक आयतर्फ भने चालु वर्ष १८ लाख ४२ हजार रुपैयाँ संकलन भई वार्षिक लक्ष्यको ८३.१४ प्रतिशत प्रगति हासिल भएको र आगामी वर्ष आन्तरिक राजस्व संकलनलाई ९५ प्रतिशत पुऱ्याइने प्रतिबद्धता व्यक्त गरिएको छ।