कालीकोट, ९ असार । कालीकोट जिल्लाको शुभकालिका गाउँपालिकामा एक पुरुषको शव बेवारिसे अवस्थामा फेला परेको छ। जिल्ला प्रहरी कार्यालय कालीकोटका अनुसार हिजो असार ८ गते सोमबार बिहान अन्दाजी १०:०० बजेको समयमा शुभकालिका गाउँपालिका वडा नं. ०५ सेरी पाल्तडीस्थित कुकुरी सामुदायिक वनमा उक्त शव फेला परेको हो।
फेला परेको लासको नाम, थर र ठेगाना खुल्न सकेको छैन। अन्दाजी ५० देखि ५५ वर्ष उमेर समूहको जस्तो देखिने उक्त पुरुषको शवलाई हाल कानुनी प्रक्रिया पूरा गरी पहिचान र सनाखतका लागि जिल्ला अस्पताल मान्म, कालीकोटको शव गृह (मर्चरी) मा राखिएको छ।
जिल्ला प्रहरी कार्यालयले मृतकको पहिचान खुलाउन सहयोग पुगोस् भनी निम्न बमोजिमको हुलिया सार्वजनिक गरेको छ:
मृतकको हुलिया:
अनुहार/वर्ण: गहुँ गोरो, तराई मूलको बासिन्दा (तराई वासी) जस्तो देखिने।
शारीरिक बनावट: उचाई अन्दाजी ५ फिट ३ इन्च, पातलो जिउडाल भएको।
कपाल/दाह्री: टाउकोको कपाल र दाह्री-जुँगा फुलेको।
कपडा: माथिल्लो शरीरमा कालो रङको कोट, कोटभित्र रातो र सेतो रङको स्विटर र घाँटीमा रातो रङको गल्बन्दी (मफलर) बाँधेको।
प्रहरीले यो हुलिया र विवरणका आधारमा कोही कसैले निज व्यक्तिलाई चिनेमा वा हराएका आफन्तहरूसँग मेल खाएमा तत्काल जानकारी गराई सहयोग गरिदिन अपील गरेको छ। मृतकका आफन्त वा चिन्नुहुने महानुभावहरूले जिल्ला प्रहरी कार्यालय कालीकोटको सम्पर्क नम्बर ९८५८३९०००६ / ९८६४८८१५७८ मा सिधै सम्पर्क राख्न सक्नुहुनेछ ।
