सुर्खेत १२ जेष्ठ। कर्णाली प्रदेशमा १६औँ प्रदेश स्तरीय राष्ट्रपति रनिङ शिल्ड प्रतियोगिता २०८३ आज एक विशेष समारोहका बीच भव्य रूपमा उद्घाटन गरिएको छ। कर्णाली प्रदेश सरकारका मुख्यमन्त्री यामलाल कंडेलले प्रतियोगिताको औपचारिक उद्घाटन गर्नुभएको हो।
प्रतियोगिताको उद्घाटन गर्दै मुख्यमन्त्री कंडेलले खेलकुद क्षेत्रको सर्वाङ्गीण विकासका लागि प्रदेश सरकारले आवश्यक लगानी र सहकार्यलाई निरन्तरता दिने प्रतिबद्धता व्यक्त गर्नुभयो। उहाँले राष्ट्रपति रनिङ शिल्ड विद्यालय तहका खेलाडीहरूको लुकेको प्रतिभा उजागर गर्ने सबैभन्दा ठूलो मञ्च भएको बताउँदै युवा खेलाडीहरूलाई खेलमार्फत प्रदेश र राष्ट्रको नाम उच्च राख्न आह्वान गर्नुभयो।
प्रदेश खेलकुद परिषद्को आयोजनामा सञ्चालित यस प्रतियोगितामा कर्णालीका १० वटै जिल्लाका खेलाडीहरूले सहभागिता जनाएका छन्। आयोजकका अनुसार प्रतियोगितामा ६०० भन्दा बढी युवा खेलाडीहरू विभिन्न खेल विधामा प्रतिस्पर्धा गर्दैछन्।
उद्घाटन कार्यक्रममा सामाजिक विकास मन्त्री घनश्याम भण्डारी विशेष अतिथिका रूपमा सहभागी हुनुहुन्थ्यो। यसैगरी प्रदेश खेलकुद परिषद्का उपाध्यक्ष प्रमोद हमाल, सदस्य सचिव रबिन चन्द, विभिन्न जिल्लाबाट आएका प्रशिक्षक, अफिसियल तथा ठूलो संख्यामा खेलप्रेमीहरूको उपस्थिति रहेको थियो।
प्रतियोगिताको मुख्य उद्देश्य कर्णाली प्रदेशमा खेलकुद विकासको जग बसाल्नु र नयाँ प्रतिभाहरूको पहिचान गरी उनीहरूलाई राष्ट्रिय तथा अन्तर्राष्ट्रिय स्तरका लागि तयार पार्नु रहेको छ। खेलकुद परिषद्ले यस प्रतियोगितालाई युवा खेलाडीहरूलाई प्रोत्साहन गर्ने अवसरका रूपमा लिएको छ।
उद्घाटन समारोहमा खेलाडीहरूको मार्चपास र विभिन्न सांस्कृतिक झाँकीहरूले रङ्गशालाको माहोललाई थप रोमाञ्चक बनाएको थियो। प्रतियोगिताले कर्णालीको खेल क्षेत्रमा नयाँ ऊर्जा थप्ने अपेक्षा गरिएको छ।
