नरहरिनाथ (कालीकोट), १० वैशाख । कालीकोटको नरहरिनाथ गाउँपालिकामा जारी १६औँ जिल्ला स्तरीय राष्ट्रपति रनिङ शिल्ड प्रतियोगितामा एथलेटिक्स विधातर्फका प्रतिस्पर्धामा तिलागुफा नगरपालिकाले आफ्नो वर्चस्व कायम गरेको छ। ९ वटै स्थानीय तहका प्रतिभावान खेलाडीहरूबीचको भिडन्तमा केही खेलाडीहरूले स्वर्ण पदकको वर्षा गर्दै आफ्नो पालिकाको साख जोगाएका छन्।
प्रतियोगिताको सबैभन्दा छिटो मानिने १०० मिटर दौडमा छात्रतर्फ तिलागुफाका नरेन्द्र बस्नेतले स्वर्ण जितेका छन् भने पलाँताका दिनेश बमले द्वितीय र नरहरिनाथका सुनिल वि.क. ले तृतीय स्थान पाएका छन्। छात्रातर्फ पनि तिलागुफाकै सरिता शाहीले स्वर्ण जित्दा पलाँताकी भविष्य बमले रजत र तिलागुफाकै सम्झना बोगटीले कास्य पदक प्राप्त गरिन्।
लामो दूरीको ३००० मिटर दौड छात्रतर्फ तिलागुफाका रविन्द्र रावत र हरि बोहोराले क्रमशः प्रथम र द्वितीय स्थान हासिल गर्दै पालिकालाई दुई पदक दिलाए। छात्रातर्फ पचालझरनाकी करिश्मा ऐडीले स्वर्ण जित्दा तिलागुफाकी सपना शाही दोस्रो र नरहरिनाथकी स्वस्तिका कठायत तेस्रो भइन्।
सामूहिक विधाको रिले दौडमा छात्रतर्फ मदन बमको नेतृत्वमा रहेको पलाँता गाउँपालिकाले स्वर्ण जित्दै आफ्नो शक्तिको प्रदर्शन गर्यो। छात्रातर्फ सरिता शाही सम्मिलित तिलागुफा नगरपालिकाले प्रथम स्थान सुरक्षित गर्दा नरहरिनाथ द्वितीय र रास्कोट तृतीय भए।
आकाश छुने प्रतिस्पर्धा हाइजम्पमा छात्रतर्फ खाँडाचक्रका हेमल रोकायाले प्रथम स्थान हासिल गरे। छात्रातर्फ पचालझरनाकी करिश्मा ऐडीले दौडमा जस्तै हाइजम्पमा पनि स्वर्ण पदक जितेर आफ्नो बहुमुखी प्रतिभा प्रमाणित गरिन्।
लङजम्प छात्रमा आयोजक नरहरिनाथका प्रशान्त विष्टले मैदानमा बाजी मार्दा छात्रातर्फ तिलागुफाकी सरिता शाहीले स्वर्ण चुमिन्। त्रिपलजम्पमा भने पलाँताका दिनेश बमले छात्रतर्फ र तिलागुफाकी सरिता शाहीले छात्रातर्फ प्रथम स्थान हासिल गर्दै आफ्नो पदक संख्या थपे।
भाला फ्याँक्ने प्रतिस्पर्धा (ज्याभलिन थ्रो) मा छात्रतर्फ पलाँताका दिनेश बमले ४३.०९ मिटरको दूरी तय गर्दै स्वर्ण जिते। छात्रातर्फ पचालझरनाकी सकियता कठायत २४.८७ मिटरका साथ प्रथम भइन् भने नरहरिनाथकी स्वस्तिका सहकारी दोस्रो र पलाँताकी प्रमिला रोकाया तेस्रो भइन्।
प्रतियोगितामा हालसम्मको नतिजा अनुसार तिलागुफा नगरपालिका पदक तालिकाको शीर्ष स्थानमा छ भने पलाँता र पचालझरना गाउँपालिकाले कडा चुनौती दिइरहेका छन्। अन्य विधाका खेलहरू अझै जारी रहेकाले अन्तिम नतिजाका लागि सबैको ध्यान खेलमैदानतर्फ मोडिएको छ।
