हालसम्म जलविद्युत्को सुरुङबाट १९१ जना र हवाई उद्धार गरिएका ५१७ जनासहित कुल ४,४५१ जनाको सफल उद्धार गरिएको छ, जसमध्ये १२९ जना विदेशी नागरिक रहेका छन्। उद्धारका लागि नेपाली सेना र निजी क्षेत्रका गरी १६ वटा हेलिकोप्टरमार्फत ९९ हवाई उडान भइसकेका छन्।

सरकारले राहत स्वरूप रसुवा र नुवाकोटलाई १/१ करोड रुपैयाँ, धादिङलाई ५० लाख रुपैयाँ तथा १५ वटा पालिकाका लागि कुल ६ करोड ७५ लाख रुपैयाँ नगद निकासा गरेको छ। ३७ ट्रक तथा हेलिकोप्टरका ७ उडानमार्फत खाद्य तथा गैरखाद्य सामग्री र सञ्चार सेटहरू प्रभावित क्षेत्रमा पठाइसकिएको छ।

क्षतिग्रस्त १९८ वटा टेलिफोन टावरमध्ये १४५ वटा मर्मतपछि सञ्चालनमा ल्याइएको छ। यस्तै नुवाकोटमा ४१ हजार लिटर डिजेल र २४ हजार लिटर पेट्रोल मौज्दात राखिएको छ भने पठाइएको ३९ हजार लिटर हवाई इन्धनमध्ये हाल ८ हजार लिटर मौज्दात र ९ हजार लिटर बाटोमा रहेको प्राधिकरणले जनाएको छ।