पोखरा, २३ जेठ । नेपालमा तीव्र गतिमा बढिरहेको युवा जनशक्ति पलायनलाई रोक्न सूचना प्रविधि (IT) र कृत्रिम बुद्धिमत्ता (AI) को क्षेत्रमा व्यापक रोजगारी सिर्जना तथा सीप विकास अपरिहार्य रहेको सरोकारवालाहरूले बताएका छन्। यसै सन्दर्भमा, देशकै अग्रणी प्रविधि संस्था ‘टेक पाईला इनोभेसन्स’ (TechPaaila Innovations) ले पोखरामा आफ्नो गण्डकी प्रदेश स्तरीय कार्यालय तथा सेवाको औपचारिक शुभारम्भ गरेको छ।
डिजिटल रूपान्तरण र आर्थिक समृद्धिको नयाँ आधार
कार्यक्रमका प्रमुख अतिथि एवं नेपाल चेम्बर अफ कमर्सका निवर्तमान अध्यक्ष राजेन्द्र मल्लले उद्घाटन गर्दै नेपालको आर्थिक समृद्धि र रोजगारी सिर्जनामा एआई र सूचना प्रविधि प्रमुख आधार भएको बताउनुभयो। “विश्व एआई केन्द्रित अर्थतन्त्रतर्फ अघि बढिरहेको बेला नेपालले नीतिगत सुधार र दक्ष जनशक्ति उत्पादनमा ढिलाइ गर्नु हुँदैन,” उहाँले भन्नुभयो। साथै, मल्लले १२ कक्षा उत्तीर्ण हुनासाथ विदेशिने युवाको लर्को रोक्न नेपालमै ‘कमाउँदै, रमाउँदै र सिक्दै’ अघि बढ्ने वातावरण बनाउनुपर्नेमा जोड दिँदै एआई कम्प्युट केन्द्र स्थापनाले नेपाललाई दक्षिण एसियाकै डिजिटल हब बनाउन सकिने धारणा व्यक्त गर्नुभयो।
‘सर्टिफाइड’ भन्दा ‘क्वालिफाइड’ जनशक्तिमा जोड
कार्यक्रमका मुख्य वक्ता तथा टेक पाईला इनोभेसन्सका एसोसिएट डाइरेक्टर चिरञ्जीवी अधिकारीले ‘सर्टिफिकेट’ भन्दा ‘सीप’ (Skills-First Concept) लाई प्राथमिकता दिनुपर्ने आवश्यकता औँल्याउनुभयो। “हामीले परम्परागत शिक्षा प्रणालीबाट माथि उठेर बजारको मागअनुसारको एआई, साइबर सुरक्षा र डाटा साइन्सका व्यावसायिक कोर्षहरू भित्र्याएका छौँ,” अधिकारीले भन्नुभयो। उहाँले युवा प्रतिभालाई स्वदेशमै रोक्न र उच्च मूल्यको रोजगारी सिर्जना गर्न एआई अर्थतन्त्रलाई राष्ट्रिय प्राथमिकतामा राख्नुपर्ने बताउनुभयो।
नीतिगत सहुलियत र कर छुटको माग
समारोहमा सफ्टेड ग्रुपका चेयरपर्सन विज्ञान श्रेष्ठले एआई इन्जिन र स्वदेशी प्रविधिलाई बढावा दिन सरकारले स्टार्टअपहरूलाई कर छुट र विशेष सहुलियत दिनुपर्ने माग गर्नुभयो। कार्यक्रम टेक पाईला इनोभेसन्सका गण्डकी प्रदेश क्षेत्रीय निर्देशकको अध्यक्षतामा सम्पन्न भएको थियो।
उद्घाटन समारोहमा क्यान महासंघ कास्कीका अध्यक्ष पुरुषोत्तम कुँवर, आइसिटी लिडर जगन गुरुङ, क्यान महासंघका केन्द्रीय सदस्यद्वय चिन्तामणि बास्तोला र खड्कबहादुर गुरुङ, क्यान महासंघ गण्डकी प्रदेशका अध्यक्ष गुणनिधि (जीएन) पाण्डे तथा सफ्टवारिका कलेजका प्रिन्सिपल प्रमोद पौडेललगायत सूचना प्रविधि क्षेत्रका दिग्गज व्यक्तित्वहरू, उद्यमी, शिक्षक र विद्यार्थीहरूको उपस्थिति रहेको थियो।
