नगरपालिकामा सार्वजनिक खरिद नियमावली नहुनु र आर्थिक कारोबारमा ‘सुत्र’ (SUTRA) प्रणालीको बेवास्ता गरिनुले आर्थिक सुशासनको धज्जी उडाएको छ। भौतिक पूर्वाधारतर्फ पुँजीगत खर्चको ७६.५२ प्रतिशत रकम असार महिनामै खर्च गरिनुले विकास निर्माणको गुणस्तर कस्तो होला भन्ने सहजै अनुमान लगाउन सकिन्छ। उपभोक्ता समितिमार्फत भएका कामहरूमा प्राविधिक नापजाँचको अभाव र मापदण्डविपरीतको भुक्तानीले बजेटको व्यापक दुरुपयोग भएको संकेत गर्छ।

जिन्सी व्यवस्थापनमा लापरबाही, तलबी प्रतिवेदन पारित नगरी तलब वितरण र कानुनसम्मत प्रक्रियाको अभावले चन्दननाथ नगरपालिकाको प्रशासनिक क्षमतामाथि नै प्रश्न खडा गरेको छ। ४२ करोडभन्दा बढीको बेरुजुले पालिकाको आर्थिक अनुशासनलाई गिज्याइरहँदा, अब पनि नेतृत्वले आफ्नो कार्यशैली नसुधार्ने हो भने चन्दननाथ नगरपालिका कागजी विकासको दुश्चक्रमा फस्ने निश्चित छ। जनताले पसिना बगाएर तिरेको करको रकम ‘बेरुजु’ को नाममा स्वाहा हुनु आम नगरवासीका लागि चिन्ताको विषय बनेको छ।