कालीकाेट- सरकारले शनिबार र आइतबार लगातार दुई दिन सार्वजनिक बिदा दिने निर्णय गरे पनि सर्वसाधारणको स्वास्थ्य उपचारलाई मध्यनजर गर्दै अस्पतालका ओपिडी (बहिरङ्ग) सेवाहरू आइतबार पनि सञ्चालन हुने भएका छन्। स्वास्थ्य तथा जनसङ्ख्या मन्त्रालयले आज एक प्रेस विज्ञप्ति जारी गर्दै स्वास्थ्य सेवा प्रवाहलाई निरन्तर र प्रभावकारी बनाउन यस्तो व्यवस्था मिलाउन सबै निकायलाई निर्देशन दिएको हो।
बिदामा पनि सेवा सुचारु
मन्त्रिपरिषद्को निर्णयअनुसार जेठ १ गतेदेखि लागू हुने गरी सातामा दुई दिन बिदा दिने व्यवस्था राजपत्रमा प्रकाशित भइसकेको छ। तर, स्वास्थ्य सेवा जस्तो अत्यावश्यक क्षेत्रमा लामो समय बिदा हुँदा बिरामीलाई मर्का पर्ने देखिएकाले मन्त्रालयले आइतबारको हकमा अस्पतालको ‘वर्कलोड’ र जनशक्ति हेरेर ओपिडी सेवा उपलब्ध गराउनु पर्ने निर्णय गरेको छ।
कर्मचारीका लागि सट्टा बिदाको व्यवस्था
आइतबार सेवा दिने कर्मचारी तथा स्वास्थ्यकर्मीहरूका लागि मन्त्रालयले सातामा दुई दिन बिदाको अधिकार भने सुनिश्चित गरेको छ। आइतबार काम गर्ने कर्मचारीलाई हप्तामा शनिबारबाहेक अर्को एक दिन बिदा मिलाउनु पर्ने र बिदा दिन नसकिने अवस्था भएमा सट्टा बिदा उपलब्ध गराउनु पर्ने विज्ञप्तिमा उल्लेख छ।
प्रादेशिक अस्पताललाई पनि निर्देशन
मन्त्रालयका सह-प्रवक्ता डा. समीरकुमार अधिकारीद्वारा हस्ताक्षरित विज्ञप्तिमा प्रादेशिक अस्पतालहरूमा समेत यही बमोजिमको व्यवस्था मिलाउन प्रदेशका स्वास्थ्य विषय हेर्ने मन्त्रालयहरूलाई अनुरोध गरिएको छ। यो नयाँ व्यवस्थाले बिदाको समयमा पनि सर्वसाधारणले झन्झटमुक्त स्वास्थ्य सेवा पाउने अपेक्षा गरिएको छ। मन्त्रालयले स्वास्थ्य सेवालाई थप जिम्मेवार र पहुँचयोग्य बनाउन यो कदम चालिएको स्पष्ट पारेको छ।
