कालीकाेट- संघीय मामिला तथा सामान्य प्रशासन मन्त्रालयले कालीकोटका दुई ठूला नगरपालिकामा नयाँ प्रमुख प्रशासकीय अधिकृत पठाएको छ। मन्त्रालयले बिहीबार गरेको उपसचिवहरूको सरुवा र पदस्थापन निर्णयअनुसार खाँडाचक्र र रास्कोट नगरपालिकामा नयाँ प्रमुख प्रशासकीय अधिकृत खटाइएको हो।
खटाइएका उपसचिवहरूको विवरण
मन्त्रालयको आधिकारिक सूचीअनुसार खाँडाचक्र नगरपालिकाको प्रमुख प्रशासकीय अधिकृतमा गृह मन्त्रालयबाट सुरेश राज जोशीलाई पठाइएको छ। यस्तै, रास्कोट नगरपालिकाको प्रमुख प्रशासकीय अधिकृतका रूपमा भूमि व्यवस्था, सहकारी तथा गरिबी निवारण मन्त्रालयमा कार्यरत उपसचिव महेश अधिकारीलाई खटाइएको छ। रास्कोटमा कार्यरत प्रमुख प्रशासकीय अधिकृत महेन्द्र जङ्ग शाहीलाई भने गृह मन्त्रालय वा अन्तर्गतको जिम्मेवारीमा तानिएको छ।
प्रशासनिक सुधारको आशा
खाँडाचक्र नगरपालिकामा लामो समयदेखि निमित्तको भरमा प्रशासनिक कार्यहरू सञ्चालन भइरहेका थिए। मन्त्रालयबाटै उपसचिव तहको स्थायी कर्मचारी खटिएपछि अब नगरको प्रशासनिक कामकारबाहीले थप गति लिने देखिएको छ। विशेषगरी पछिल्लो समय खाँडाचक्रले सरकारी सवारी फिर्ता गर्ने र इन्धन खर्च कटौती गर्ने जस्ता कडा कदम चालेको सन्दर्भमा नयाँ प्रमुख प्रशासकीय अधिकृत जोशीको आगमनलाई अर्थपूर्ण रूपमा हेरिएको छ।
मन्त्रालयले जम्मा ५० जना उपसचिवहरूको सरुवा गर्ने क्रममा कालीकोटका यी दुई नगरपालिकालाई प्राथमिकतामा राखेर कर्मचारी पठाएको हो। सरुवा भई आएका दुवै प्रमुख प्रशासकीय अधिकृतहरूलाई तत्काल रमाना लिएर कार्यक्षेत्रमा हाजिर हुन मन्त्रालयले निर्देशन दिएको छ।
