कालीकाेट- आज देशभरिको मौसममा उल्लेख्य बदलाव आउने जल तथा मौसम विज्ञान विभागले जनाएको छ। विशेषगरी पश्चिम नेपालका प्रदेशहरूमा मौसम बढी आक्रामक देखिने पूर्वानुमान गरिएको छ।
आज दिउँसो गण्डकी, लुम्बिनी, कर्णाली र सुदूरपश्चिम प्रदेशमा मौसम पूर्णतया बदली रहनेछ। यी प्रदेशका धेरै स्थानहरूमा मेघगर्जन, चट्याङ्ग, हावाहुरी र असिनासहित मध्यम वर्षाको सम्भावना रहेको छ।
विशेष सतर्कता:
भारी वर्षा: गण्डकी, लुम्बिनी, कर्णाली र सुदूरपश्चिम प्रदेशका पहाडी तथा हिमाली भू-भागका एक-दुई स्थानमा भारी वर्षा र हिमपातको सम्भावना रहेको छ।
अन्य प्रदेश: कोशी र बागमती प्रदेशका पहाडी भू-भागका केही स्थानहरू तथा मधेश प्रदेशसहित बाँकी तराईका थोरै स्थानहरूमा पनि मेघगर्जनसहित वर्षाको सम्भावना छ।
राती पनि मौसम शान्त रहने देखिँदैन। देशभर साधारणतया बदली रहनेछ। कोशी, मधेश र बागमती प्रदेश लगायत देशका पहाडी तथा हिमाली भू-भागका केही स्थानमा वर्षा हुनेछ भने बाँकी तराईका थोरै स्थानमा पनि मेघगर्जन र चट्याङ्गसहित मध्यम वर्षा र हिमपातको सम्भावना रहेको विभागले जनाएको छ।
१. हावाहुरी र चट्याङ्ग: मेघगर्जन र चट्याङ्गको समयमा सुरक्षित स्थानमा बस्न र विद्युतीय उपकरणको प्रयोगमा सावधानी अपनाउन अनुरोध गरिएको छ।
२. यात्रा र ढुवानी: भारी वर्षा र हिमपातको सम्भावना रहेका पहाडी तथा हिमाली जिल्लाहरूमा यात्रा गर्दा वा सवारी साधन चलाउँदा विशेष सतर्कता अपनाउनु पर्ने देखिन्छ।
३. कृषि: असिना र हावाहुरीले पाकेको बालीनालीमा क्षति पुर्याउन सक्ने भएकोले आवश्यक सुरक्षात्मक उपाय अपनाउन किसानहरूलाई सुझाव दिइएको छ।
स्रोत: जल तथा मौसम विज्ञान विभाग
