कालीकोट- जिल्ला प्रशासन कार्यालय कालीकोटले पेट्रोलियम पदार्थ तथा एलपी ग्यासको कृत्रिम अभाव सिर्जना नगर्न व्यवसायी तथा उपभोक्तालाई आग्रह गरेको छ।
मध्यपूर्व क्षेत्रमा देखिएको युद्धको असरका कारण अन्तर्राष्ट्रिय बजारमा पेट्रोलियम पदार्थ तथा एलपी ग्यासको आपूर्ति र मूल्यमा प्रभाव पर्न सक्ने अवस्थालाई मध्यनजर गर्दै प्रशासनले यस्तो सूचना जारी गरेको हो।
प्रशासनले पेट्रोलियम पदार्थ तथा एलपी ग्यासको कारोबार गर्ने डिलर, डिस्ट्रीब्युटर तथा व्यवसायीहरूले कृत्रिम अभाव सिर्जना गर्ने उद्देश्यले अनावश्यक रूपमा स्टक जम्मा गर्ने, लुकाइछिपाइ भण्डारण गर्ने वा बिक्री वितरणमा अवरोध पुर्याए प्रचलित कानुन बमोजिम कडा कारबाही गरिने चेतावनी दिएको छ।
त्यस्तै उपभोक्तालाई पनि आवश्यकताभन्दा बढी पेट्रोलियम पदार्थ तथा ग्यास भण्डारण नगर्न आग्रह गरिएको छ। इन्धनको अनावश्यक प्रयोग नगरी मितव्ययी प्रयोग गर्न तथा सम्भव भएसम्म वैकल्पिक ऊर्जाका स्रोत, विशेषगरी विद्युतिय उपकरण (इन्डक्सन चुलो लगायत) प्रयोग गर्न प्रशासनले अनुरोध गरेको छ।
कानुन विपरीत कृत्रिम अभाव सिर्जना गर्ने व्यक्ति, फर्म वा संस्थाबारे जानकारी पाएमा सम्बन्धित निकायलाई सूचित गर्न समेत प्रशासनले सबैमा अपिल गरेको सहायक प्रमुख जिल्ला अधिकारी जनक शर्माले बताउनु भयाे।
